Çiktän tış êsselek arqasında mäktäplär yabıldı
Aziyaneñ qayber illärendä yuğarı temperatura belem birügä ayaq çala
Aziyäneñ küp kenä illärendä çiktän tış êsseleklär arqasında mäktäplärne waqıtlıça yaptılar.
Hindstannıñ Kerala töbägendä xökümät cirlektäge uqu yortlarınıñ 6nçı mayğa qadär açılmayacağı turında qarar çığardı. İlneñ meteorologları citkergänçä, Keralada uzğan ayda 5 êsse hawa dulqını buldı. Temperatura normadan 5,5 gradusqa artıp +41,9ğa citte. 29nçı aprel’dä anda 2 keşe qoyaş suğudan ülde. Tulayım Hindstanda iñ êsse aprel’ ayı kiçerdelär.
Temperatura +37dän dä artıp kirkän Bangladeşta da belem birü tuqtatılıp tora. İldä yaqınça 33 million bala mäktäpkä yöri almıy.
Kambodjada isä däwlät mäktäplärendä belem birüne köndä 2 säğat’kä genä qaldırırğa çaqırdılar.
Filippinnarda êsselekneñ xätär däräcägä citüe belderelä. Anda mäktäpkä baru 4 köngä tuqtatılıp tora. Başqala Manilada temperatura +37 gradustan artıp kitäçäge farazlana.
Singapur dön’ya observatoriyäse mödire Benjamin Xorton yuğarı temperaturağa ozaq waqıtlı çişeleş kiräklegenä basım yasıy. “Parnik gazı bülep çığaru problemasın qararğa kiräk”,-di ul.
