Çin “Covid-19” peyvəndinin kütləvi marketinqinə icazə verdi

  Çinin Dövlət Tibbi Məhsullar Administrasiyası Çin Hərbi Tibb Akademiyası və "CanSino Biologics" şirkəti tərəfindən birgə hazırlanan “Covid-19” əleyhinə vaksinin ölkədə kütləvi marketinqinə icazə verib.

  Çində marketinqinə icazə verilən “Covid-19” vaksinləri arasında yalnız "CanSino" şirkətinin peyvəndinin bir dozası yeni növ koronavirusa qarşı immunitet yarada bilir. Belə ki, bu peyvəndin bir dozası bədəndə humoral və toxuma immun cavabı yaradır. Vaksinin saxlanma və daşınması üçün 2-8 dərəcə selsi temperatur rejimi tələb olunur.

  Qeyd edək ki, “CanSino Biologics" şirkəti ötən ilin mart ayında dünyada birinci olaraq koronavirusa qarşı vaksinin insanlar üzərində kliniki sınaqlarının ilk mərhələsinə başlayıb. Bu mərhələ sınaq yeni növ koronavirusun ilk aşkarlandığı Hubey vilayətinin paytaxtı Uxan şəhərində təşkil olunub. Vaksinin immunogenliyi və təhlükəsizliyi baxımından tədqiqatların ikinci mərhələsinin nəticələri ötən ilin iyulunda resenziyalaşdırılan “The Lanset” tibb jurnalında dərc edilib. Vaksinin bir dəfə yeridilməsi təhlükəsiz olub və sınaqda iştirak edənlərin əksəriyyətində immun cavabına səbəb olub. İlk 14 gün ərzində pasiyentlərdə immun cavabı müşahidə olunub, 28 gün ərzində tədqiqat iştirakçılarının əksəriyyətində əhəmiyyətli humoral və toxuma immun cavabı yaranıb. Kliniki sınaqların üçüncü mərhələsi isə Çin ilə yanaşı, Pakistan və Rusiyada da aparılıb, fevralın 8-də açıqlanan ilkin nəticələrə əsasən onun effektivliyi 74,8 faiz olub.

  Çin hökuməti indiyədək yerli mütəxəssislərin hazırladığı 4 “Covid-19” peyvəndinin, o cümlədən Azərbaycanda da vaksinasiya prosesində tətbiq olunan "Sinovac" şirkətinin "CoronaVac" peyvəndinin kütləvi marketinqinə icazə verib.