Ашхабад шаарында Экономикалык кызматташтык уюмунун 15-саммити өттү

Түркмөнстандын президенти Бердымухамедов: «Транспорт жана энергетика тармагында кызматташтыкты өнүктүрүү Түркмөнстандын ЭКУ алкагындагы эң маанилүү приоритеттеринин бири»

28 Kasım 2021 15:20

Түркмөнстандын борбору Ашхабад шаарында Экономикалык Кызматташтык Уюмунун (ЭКУ) 15-саммити өттү.

ЭКУ саммитине Кыргызстандын президенти Садыр Жапаров, Түркиянын президенти Режеп Таййип Эрдоган, Азербайжандын президенти Илхам Алиев, Ирандын президенти Ибрагим Раиси, Пакистандын президенти Ариф Алви, Тажикстандын президенти Эмомали Рахман, Өзбекстандын президенти Шавкат Мирзиеев, Казакстандын премьер-министри Аскар Мамин катышты.

Каракум мейманканасында өткөн саммит алкагында Түркиянын президенти Режеп Таййип Эрдоган ЭКУнун кезектеги төрагалыгын Түркмөнстандын президенти Гурбангули Бердымухамедовго өткөрүп берди.

Түркмөнстандын президенти Бердымухамедов Саммитте сүйлөгөн сөзүндө уюмга мүчө  мамлекеттер  ортосундагы кызматташтыкты өнүктүрүүгө басым жасады.

«Түркмөнстандын ЭКУнун алкагындагы эң маанилүү артыкчылыктарынын бири - транспорт жана энергетика тармагындагы кызматташтыкты өнүктүрүү. Бул тармактар ​​дүйнөлүк экономикалык өсүштө чечүүчү роль ойнойт»,-деди ал.

Ал Түркмөнстан-Ооганстан-Пакистан багыты боюнча электр линиясын, Түркмөнстандан Ооганстанга темир жол линиясын жана Түркмөнстан-Ооганстан-Пакистан-Индия жаратылыш газ түтүгүн куруу иштери улантылып жатканын баса белгиледи.

Өз кезегинде Ооганстандагы кырдаалга токтолуп, ушул оор мезгилде  ооган элине тез жана натыйжалуу гуманитардык жардам көрсөтүү зарылдыгын белгиледи.

Түркмөнстандын президенти Бердымухамедов ЭКУ өлкөлөрүн коронавирус эпидемиясынын алдын алуу жаатында кызматташутыкты кеңейтүүгө чакырды.

Anahtar Kelimeler: ЭКУ, Түркмөнстан,