Atambayev täslim bulmadı

Qırğızstannıñ êlekkege ilbaşı Almazbek Atambayevnıñ öyenä qorallı basqın buldı. İlneñ minlek köçläre kiçä kiç maxsus operaśiyä oyıştırıp anı qulğa alırğa teläde. Bilgele bulğança, wazıyfasınnan faydalanıp qanun bozuda ğayeplänüçe Atambayevnıñ qağılğısızlığın ğamäldän çığardılar.

Operaśiyä barışında êlekkege däwlät başlığınıñ saqçıları iminlek köçlärenä qarşılıq kürsätte, tarafdarları isä öyne saq astına aldı.

Atambayev, şulay itep, iminlek köçlärenä täslim bulmadı.

Milli qurqınıçsızlıq däwlät komitetı maxsus xäräkät törkeme häm êçke xärbi berleklär operaśiyäne yartı yulda qaldırıp Atambayev yäşi torğan Koy-Taş awılınnan kitte.  

Waqıyğa urınında êçke êşlär ministrı urınbasarı Kursan Asanov ta bar ide. Ul poliśiyäneñ wäzğıyät’ne kontrol’dä totuın belderde. “Bolar barısı da dialog yulı belän çişelergä tiyeş. Xäzerge waqıtta monıñ öçen köç quyabız,”-dide ul.

Atambayevnıñ teläktäşläre buluların belderüçe yözlärçä yäş’ keşe awılnıñ kerü häm çığu yulında iminlek çaraları kürüçe poliśiyä belän taş atıp häm tayaqlar belän bäreleşkä kerde.

Êçke êşlär ministrı urınbasarı Asanov yäş’lärne taralışırğa çaqırdı. Alar isä Atambayevnıñ öyenä kitärgä röxsät birülären, telefon häm internet êlemtäseneñ täêmin itelüen soradı.  

Monnan tış, Koy-Taş awılında urnaşqan ilneñ iñ zur armiyä kazarmalarınnan küp sanda bronetexnika häm xärbilär utırğan yök maşinalarınıñ başqala Bişkäkkä taba kitüe kürende.

Atambayev öyennän telefon aşa xalıqqa möräcäğat’ itep, üzenä teläktäşlek kürsätüçelärgä räxmäten citkerde. Ul poliśiyägä yazmaça şahitlek itärgä teläwen tağın ber qat iskärtte.

“Sezğä zur özelü belän möräcäğat’ itäm. Xakimiyät töp qanunnı bozıp mine saq astına alırğa teläde. Minem awıznı qaplarğa teläde. Kiçke säğat’lärdä mıltıqlar belän kildelär. Başta plastik yädrä, soñınnan çının qullandılar. Küñelem ärni. Bu oyat. Atambayev terrorçı tügel. Miña yärdäm itärgä kilgän watandaşlar terrorçı tügel. Xakimiyät üz xalqına qurğaş yawdırdı. Xakimiyätkä äytäm. Tuqtağız,”-dide êlekkege ilbaşı.    

Qırğızstan sälamätlek saqlaw ministrlığınnan belderülärençä, operaśiyä waqıtında yaralanuçılarnıñ sanı 45kä citte. Çuy töbäge poliśiyä idaräse başlığı Samat Kurmankulov yaralanğannan soñ komağa kergän. Anıñ xäleneñ bik awır buluın belderälär.

Bik awır yaralanğan 22 yäş’lek saq xezmätkäre isä xastaxanädä ülde.

Qırğızstanda 2011nçe-2017nçe yıllar arasında il belän idarä itkän Almazbek Atambayevqa qarşı bik küp cinayät’ êşe açılğan. Alar, nigezdä, däwlät milken üzläşterü, wazıyfadan yawızlarça faydalanu belän bäyle.