Azärbaycanda xökümätkä yaña keşe kilde

Azärbaycan xökümäte räise Novruz Memmedov wazıyfasınnan kitte, urınına Ali Asadov kilde. İlneñ parlamentı yaña baş ministrnı bilgeläw öçen cıyıldı.  

Azärbaycan ilbaşı İlham Aliyev Novruz Memmedovnıñ êştän kitü turındağı ğarizasın qabul itkän häm buşağan känäfigä iq’tisadi mäs’älälär öçen cawaplı kiñäşçeseneñ namzäten kürsätkän. Tawış birü yulı belän Ali Asadov yaña xökümät räise bularaq saylandı. Soñınnan çığış yasap, ul üzenä kürsätelgän ışanıç öçen räxmäten citkerde.

Ali Asadov 1956nçı yılda Naxçivanda tuğan. 1978nçe yılda Mäskäw xalıq iq’tisadı institutın tämamlıy. Sovetlar çorında Asadov Azärbaycan milli fän akademiyäsendä törle wazıyfalar başqara. Bäysezlek alğannan soñ, 1995nçe yılda anı deputat itep saylıylar, 1998nçe yılda ul iq’tisadi mäs’älälär buyınça ilbaşı kiñäşçese itep bilgelänä.