BMOda täwge tapqır üzbäkçä çığış yañğıradı

Üzbäkstan ilbaşı Şäwkät Mirziyoyev BMO ğomum şurasına üzbäk telendä möräcäğat’ itte. Bäysezlek alğannan birle älege cömhüriyätneñ ber liderı da milli teldä çığış yasamıy ide. Mondıy çaralarda gel rus telendä söylädelär. Şäwkät Mirziyoyev videoçığışında: “Bügen ilebezdä demokratik üzgäreşlär kire borıp bulmas xälgä kilde,”-dide. Ul 3 yıl êlek üzeneñ BMO ğomum şurasında Üzbäkstanda tamırdan reformalar yasaw mäs’äläsendä qararlı buluın äytüen xäterlätte. “Säyäsi, sośial’ häm iq’tisadi üzgäreşlärne êçenä aluçı kiñ qırlı reformalar näticäsendä yaña Üzbäkstan barlıqqa kilä,”-dide Mirziyoyev.

Törki däwlät liderı, Kovid-19 mäs’äläsenä tuqtalıp, koronavirus kizüeneñ keşelekneñ global’ yanawlarğa qarşı köçsez buluın kürsätüen häm daimi dialog, ışanıç häm yaqın xezmättäşlekneñ ähämiyäten añlarğa yärdäm itüen belderde. Ul bu qısalarda tırışlıqlarnıñ berläşterelüe, cawaplılıqlarnıñ nığıtıluı, xalıqara xezmättäşlekneñ üsterelüe, Bötendön’ya sälamätlek saqlaw oyışmasınıñ statusın häm mömkinleklären arttıru, wäqalätlären kiñäytügä ixtiyac xis itelüen äytte. Mirziyoyev älege nisbättän kizü çorında däwlätlärneñ üz teläkläre belän iniśiativa kürsätüläre xaqında BMO qul astında qanun proyektı xäzerläw kiräklegen assızıqladı. Bu dokument här däwlätneñ watandaşları häm xalıqara xezmättäşlärenä qarata yöklämälären üz êçenä alırğa tiyeş.