İskeşähärdä Fäwziyä Bäyrämova belän oçraşu
Törkiyäneñ İskeşähär qalasında tanılğan cämäğät êşleklese, tatar yazuçısı häm tarixçı Fäwziyä Bäyrämova belän oçraşu uzdı.
İskeşähär Törek uçağı belän Qazan tatarları mädäniyät häm yärdämläşü cämğiyäteneñ qunağı bularaq İskeşähär qalasına kilgän Fäwziyä xanım biredä Seber tatarlarınıñ Törkiyägä küçep kitüen añlatuçı “Xicrät” kitabın täq’dir itte.
Oçraşunı açıp cibärgän İskeşähär Törek uçağı başlığı professor doktor Nädim Ünal, süzne Fäwziyä xanımnı tanıtudan başladı.
Tormışın törki dönya köräşenä bağışlağan Fäwziyä xanımnıñ qaharman törki-tatar xatın-qızı buluın añlatuçı Nädim äfände Fäwziyä Bäyrämovadağı törkiçelek añ-belemeneñ başqalarğa ürnäk buluın teläwlären assızıqlap äytep uzdı.
İdel-Ural törkiçelegeneñ äydäp baruçanlığın başqarğan Fäwziyä Bäyrämovanıñ Tatarstan parlamentında wazıyfasın ütäwen häm törle awırlıqlarğa duçar buluın äytüçe Nädim Ünal Fäwziyä xanımnıñ Törek uçaqlarına nigez salğan Yosıf Aqçura, Tatar däwläteneñ soñğı Däwlät başlığı Sadri Maqsudi Arsal, Ğayaz İsxaqilarda bulğanı kebek säyäsätçe sıyfatı belän ber rättän zıyalı buluına basım yasadı.
Nädim äfände, Tatar bayrağınıñ celferdäwen däwam itüen teläp, törki-tatar dönyası belän bäyle 50gä yaqın kitap avtorı Fäwziyä Bäyrämovağa räxmätlären citkerde.
İskeşähär törek uçağı cämğiyäteneñ binasında uzğan oçraşu waqıtında Fäwziyä Bäyrämova kitabın tanıtu belän ber rättän, sorawlarğa cawap birep, Tatarstandağı soñğı wazğiyät häm tatar teleneñ bügenge torışı turında da mäğ’lümat birep uzdı.
Fäwziyä xanım İskeşähärdäge tatar cämğiyäte binasında millättäşlär belän dä oçraştı.
Oçraşuda Antaliyadan qatnaşqan tatar şağire häm advokat, Arça yegete Fänis Zıyalı tatar moñnarın yañğırattı.
