Robert Miñnullin: “Kötmägändä awalar da kitälär”
27nçe mart tönendä tanılğan tatar şağıyre Robert Miñnullin wafat buldı
Tatar milläteneñ tanılğan şağire Robert Miñnullin 71 yäşendä wafat buldı.
Robert Möğallim ulı Miñnullin 1948nçe yılnıñ 1nçe avgustında Başqortstannıñ İleş rayonında tuğan. Ozaq yıllar buyı “Yäş’ leninçı” (Sabantuy) gazetın citäklägän Robert Miñnullin Tatarstan Balalar fondı räise häm Tatarstan Däwlät Şurası xalıq ışanıçlısı bula.
Tatarnıñ mäşhür şağire üzeneñ “İnstagram” bitendäge soñğı yazmasında: “Ağaçlar da, duslar da kötmägändä genä awalar da kitälär şul! Sizmi dä qalasıñ”, - dip urtaqlaşqan ide.
Tatarstan citäkçelege: “Tatarstan cämäğätçelege zur yuğaltu kiçerä”, - dip R.Miñnullin wafatına bäyle qayğı urtaqlaşu belderde.
Xalıq şağire Robert Miñnullin belän xuşlaşu 28nçe mart könne 09:30da Ğ. Qamal isemendäge Tatar däwlät akademiya teatrı qarşındağı mäydanda uzaçaq.
Кеше гомерләре бигрәк кыска…
Ходай безгә, белмим, нигәдер,
Кошлар гомере дә бирмәгән шул.
Яши белсәң җитәр, дигәндер.
Кеше гомерләре бигрәк кыска…
Шунсына да шөкер итәбез.
Кыска гына шул бер гомернең дә
Кадерләрен белми китәбез.
Кеше гомерләре бигрәк кыска…
Кадерләрен бик тә белерлек.
Һәр сәгате аның санаулы бит,
Һәр сәгате үзе — гомерлек.
Кеше гомерләре бигрәк кыска…
Сизелми дә хәтта калына.
Әйтерсең лә, гомер учаклары
Бер мизгелгә генә кабына.
Кеше гомерләре бигрәк кыска…
Бер сүнә дә кабат кабынмый.
Һәрберебезгә дә кагыла ул,
Шагыйрьләргә генә кагылмый.
Роберт Миңнуллин
