Angliyä Süriyädäge balalarnı kaytara

Angliyä üterelgän DEAŞ äğ’zası watandaşlarınıñ Süriyädä qalğan yätim balaların alıp qaytu qararı çığardı. Tışqı êşlär ministrı Dominik Raab älege mäs’älä belän bäyle belderü yasadı. “Äye, kire qaytuları öçen mömkinlek tudırdıq, çönki êşlänergä tiyeşle iñ döres närsä bu,”-dide ul.

Raab balalarnıñ ğadäti tormışqa qaytularına teräk bulu kiräklegen assızıqladı. “Bu gönahsız, yätim balalar hiçber waqıt suğış wäxşätenä duçar bulmasqa tiyeş ide,”-di ministr.  

Qurqınıçsızlıq maqsatlarınnan balalarnıñ isemnäre äytelmi. Alar êlek DEAŞ terrorçı oyışması kontrole astında qalğan cirleklärdän Angliyägä qaytarıluçı berençe watandaşlar bulaçaq.

Süriyädä lager’larda Angliyädän 25 xatın-qız häm 60tan artıq bala buluı belderelä. Sabıylarnıñ kübese 5 yäşennän keçkenä.

Angliyä başta älege watandaşların kire alırğa bik telämäde. Raab uzğan ayda yätim häm baliğ’ bulmağan balalarnı qaytaru turında uylawların belderde.

Monnan alda Franśiyä, Germaniyä, Norvegiyä häm Daniyä bik az sanda DEAŞlı watandaşlarınıñ balaların ilgä qaytardı.