Duda ciñde

Pol’şada ilbaşı Andrey Duda ikençe tur saylawlarda östen çıqtı.

İlneñ saylaw komissiyäse räise Silvester Marciniak beldergänçä, tawışlarnıñ 99,97%ın sanaw tögällängän häm räsmi bulmağan näticälärgä qarağanda, Andrey Duda ciñü yawlağan.

Xakimiyättäge konservativ Xokuk häm ğadellek partiyäsennän Duda tawışlarnıñ 51,21%ın, sulçı Liberal häm Yäşellär oyıştırğan Civik platforması namzäte Varşava mêrı Rafal Tşaskovski isä 48,79%ın aldı.

Saylaw komissiyäse räise sanawnıñ däwam itüen, ämma näticälärneñ monnan soñ üzgärmäyäçägen citkerde.

İldä yaqınça 30 million saylawçı bar. Tawış birüdä alarnıñ 68,12%ı qatnaşqan. Monı rekord däräcä dip belderdelär.

İkençe tapqır ilbaşı bularaq saylanğan Duda tağın 5 yıl älege wazıyfanı däwam itäçäk.

Pol’şada 28nçe iyün’dä uzğan häm 11 namzät qatnaşqan berençe turda Duda 43%, Tşaskovski 30% tawış cıyğan ide.