"Gayeplene beläbez"

AQŞ ilbaşı Donal’d Tramp Soğud Ğaräbstanınıñ neft’ êşkärtü ob’yektlarına höcümnärne kem oyıştıruın belülären äytä. Bu xaqta ul Twitter xisabınnan yazdı. “Soğud Ğaräbstanınıñ neft’ ob’yektları höcümgä duçar buldı. Ğayeplene belüebezgä ışanu öçen säbäp bar. Monıñ raslanuına qarap bez maqsatqa yünäläçäkbez häm qorallarıbız äzer. Barı tik patşalıqtan bu höcüm öçen cawaplınıñ kem buluın işetergä telibez”,-dide Tramp.  AQŞ Riyadtan kilgän xäbärgä qarap nindi şartlarda xäräkät itäçäklären bilgeläyäçäk.

Tramp, älege neft’ êşkärtü ob’yektlarına höcümnän soñ, AQŞta qara altın bazarında dulqınlanunı buldırmaw öçen zapaslarnı ixtıyacğa qarap qullanunı röxsät itte.  

İsegezgä töşeräbez, Soğud Ğaräbstanınıñ milli neft’ şirkäte Saudi Aramkonıñ 2 ob’yektına şimbä könne qorallı dronnar belän höcüm oyıştırıldı. Şunnan soñ, êşxanälärdä yanğın çıqtı.

Waqıyğada ülüçe yäisä yaralanuçınıñ bulmawın belderälär. Älegä anda berkemne dä räsmi ğayeplämädelär. Xusilär üzläre belderü yasap, höcümne 10 dron belän başqaruların citkerde.  

Yämändä İran yärdämendäge xusilär soñğı waqıtlarda, başlıça, yaqın häm yıraq aralarğa atuçı balistik raketalardan tış qorallı keşesez hawa apparatları belän Soğud Ğaräbstanınıñ törle cirleklärenä höcüm yasıy. Ğadättä, alarnı saqlanu sistemaları belän täêsirsez xälgä kiterälär.