Ğazzädäge kümäk qaberleklär

Amerika Quşma Ştatları İzrail höcümnäre astındağı Ğazzädä kümäk qaberleklär küreneşläreneñ “tirän borçuğa saluın” äytte.  

AQŞ däwlät departamentı süzçese urınbasarı Vedant Patel köndälek matbuğat brifingında Ğazzädäge soñğı wäzğıyät’ häm Xan -Yunusta tabılğan kümäk qaberleklär mäs’äläsenä tuqtaldı. Ul 300dän artıq fälästinle kümelgän qaberlek nisbätennän Tel’-Aviv belän yaqın êlemtädä toruların citkerde. “Bu xaqtağı xäbärlärne kürdek häm İzrail xökümätennän tağın da kübräk mäğ’lümat soradıq”,-dide Patel’.  “İzrail xökümäteneñ ışanıçlı çığanaq buluına häm bezgä bu mäs’älädä açıqlıq kertäçägenä ışanasızmı?” digän sorawğa isä ul: “Äye, ışanabız”-dip cawap birde.

Aq Yort milli iminlek êlemtä kiñäşçese Djon Kirbi dä älege xäbärlärne kürüen häm şunda uq İzrail yağı belän êlemtägä kerüen äytte.

İzrail armiyäseneñ aylar buyı däwam itüçe höcüme häm basıp aluı astındağı Xan-Yunus şähärendä kümäk qaberleklär tabıldı. AQŞ idaräse bu nisbättän bäysez tikşerü ütkärügä qarşı çıqtı häm İzrail idaräse alıp baraçaq tikşerü näticälären qabul itäçägen belderde.