Liviyädäge suğışuçı taraflarğa yärdäm itmäyäçäklär

Germaniyä kanślerı Angela Merkel’ Liviyä konferenśiyäseneñ BMOnıñ älege ildä tınıçlıq urnaştıru tırışlıqlarına öleş kertüen äytte. Ul BMO ğomum särqatibe Antonio Guterriş, oyışmanıñ Liviyä maxsus wäkile Xassan Salame häm Germaniyä tışqı êşlär ministrı Xeyko Maas belän sammittan soñ urtaq matbuğat cıyılışı uzdırdı.

Merkel’ Berlinda bik tığız häm ähämiyätle oçraşular uzuın citkerde. Ul Liviyä nizağın beterü tırışlıqlarına yaña säyäsi impul’s birergä teläwlären dä äytte. Anıñ fikerençä, konferenśiyädä qatnaşuçılarnıñ barısı da säyäsi çişeleş yulına ixtiyac buluı mäs’äläsendä urtaq fikerdä.

Merkel’ monnan soñğı prośessta külämle plan tözü öçen kileşülären belderde.  Ul ber kön êşendä Liviyädäge problemalarnıñ çişelmäyäçägen belülären, şulay da bu söyläşülärneñ möhim buluın assızıqladı. “5kä 5 keşelek xärbi komitetnıñ tözelüe öçen isemnär birelü ähämiyätle ide,”-di ul. Barlıq qatnaşuçılar 5kä 5 cıyılışı uzğanğa qadär Liviyädäge suğışuçı yaqlarğa yärdäm itmäskä kileşkän.

Merkel’ xäzer cıyılış öçen çaqıru xäzerlänäçägen häm kiläse atnada alarnıñ tiyeşle şäxeslärgä cibäreläçägen belderde. Anda ul utnı tuqtatunıñ daimi qaluın täêmin itäçäklärenä ömetlänä.