Meksikada ütkärgeçlärdä şartlaw
Qazada ülüçelärneñ sanı arttı
Meksikada şimbä könne neft’ütkärgeçlärdä bulğan şartlawda ülüçelärneñ sanı 85kä citte. Qurqınıç qaza başqala Mexikodan 100 kilometr yıraqlıqtağı Tlauêlil’pan rayonında kilep çıqtı. Anda tişelgän torbalardan aqqan neft’kä ut qabu näticäsendä şartlaw buldı.
Sälamätlek saqlaw ministrı Xorxe Alkoser beldergänçä, bu mizgeldä yözlärçä keşe torbadan aqqan neft’ne urlıy torğan bulğan. Xäzerge waqıtta 85 keşeneñ hälaq buluı häm 58eneñ xastaxanädä yatuı äytelä.
İldä torbalardan yağulıq urlawlar küp bulu säbäple qayber ütkärgeçlär xezmätkä yabıldı häm bu sıyıq yağulıq krizisına kiterde. Näticädä yağulıq belän täêmin itü waqıtlıça tankerlar aşa başqarıla. Kiçegülär arqasında benzin stanśiyälärendä ozın çiratlar tezelä.
Meksika däwläte başilığı Lopes Obrador sıyıq yağulıq problemasınıñ ütkärgeçlärdän urlawlar belän köräş näticäse buluın belderde häm watandaşlarnı sabır bulırğa çaqırdı. Ul 2018nçe yılnıñ 1nçe dekabrendä wazıyfasına kereşte. Yaña ilbaşı däwlätneñ ütkärgeçläre häm sıyıq yağulıq depolarınnan urlawlarğa çik quyarğa süz birde. Obrador äytkänçä, oyışqan cinayät’çel törkemnär ütkärgeçlärne tişep krannar quya häm şunda uq depolar tözi. Ul alarnıñ qayberlären yabarğa boyırdı. “Qararbız - kem başta arır. Yağulıq urlawçılarmı, bezme?”- dide ilbaşı.
İldä däwlätneñ torbaları häm yağulıq depolarınnan urlawlar yılına 3 milliard dollar zarar kiterä.
Bäyläneşle xäbärlär
AQŞ Pol'şa belän Niderlandqa raketa cibärä
Awrupa illäre saqlanu mömkinleklären arttıru maqsatınnan AQŞtan qorallar satıp aldı