"Pıçraq kiyemnären Amerikağa yudırta"

İzrail prem’yer-ministrı Binyamin Netanyaxunıñ Amerika Quşma Ştatlarına barğanda pıçranğan kiyemnären dä üze belän aluı öyränelde.

The Washington Post gazetına açıqlaw yasağan Amerikan räsmi zatları İzrail xökümät räiseneñ Vaşingtonğa säfärlärendä çemodannarğa tutırıp kerle kiyem alıp kilüen häm alarnı İlbaşı idaräseneñ qunaq öyendä buşlay yudıruın citkerde.

Xäbärgä kürä Netanyaxu bu yağı belän Bleyr Xausda şöhrätle buldı.

Gazetqa açıqlaw yasağan ber êşçe tübändägeçä belderde: “Bezgä çemodannarı belän pıçraq kiyemnären Netanyaxulılar ğına alıp kilä. Monı küp tapqır yasağannarı öçen belä torıp başqaralar.”

İzrail citäkçelegeneñ Vaşingtondağı ilçelege isä bu ğayepläwlärgä cawap qaytardı häm Netanyaxu Tramp aradaşçılığında Aq Yortta Berläşkän Ğaräp Ämirlekläre häm Baxreyn belän imzalağan mönäsäbätlärne cayğa salu kileşülärenä tap töşerergä tırışuların citkerde.

Netanyaxu säfäreneñ waz kiçelmäs öleşe bulğan pıçraq kiyemnärne Barack Obama citäkçelege waqıtındağı räsmi zatlar da döres dip belderde.