Qıtaydağı oçqıç hälakäte maxsus yasalğanmı?

Qıtayda 21nçe martta hälakätkä yulıqqan yulçı oçqıçınıñ qara ärcäsen AQŞta tikşergännän soñ tabılğan dälillär anıñ maqsatçan räweştä töşerelüen kürsätä.

“Wall Street Journal” gazetınıñ xäbärenä qarağanda, qara ärcäne tikşerüdä qatnaşqan häm isemen belderergä telämäwçe ber wäqalätle qazağa kitergän vertikal’ oçışnıñ kontrol’ sisteması komandaları belän tormışqa aşırıluı mömkinlegen belderä.

Qıtaydağı tikşerenüne alıp baruçı wäqalätlelärneñ bügengä qadär texnik taypılış yäisä oçış kontrol’lärendäge problema turında söylämäwläre iğ’tibarnı cälep itä. Amerikalılar pilot yäisä kabinağa kergän başqa bereneñ maqsatçan bularaq hälakätkä kiterüe ixtimalın alğa sörä.  

“China Eastern” hawa yulları şirkätennan isä gazetağa yasağan belderüdä qazağa oçqıç belän bäyle problemanıñ kiterüen isbatlawçı dälil tabılmawı häm oçuçılarnın sälamätlege, ğailä häm finans xälläre yaxşı buluı äytelä.

İsegezgä töşeräbez, “China Eastern” hawa yulları şirkätenä qarawçı Boing yulçı oçqıçı 21nçe martta kilep töşte. Anda bulğan 132 keşeneñ barısı ülde.

Oçışnı küzätü mäğ’lümatlarına qarağanda, oçqıç yaqınça 9 meñ metr biyeklektä xäräkät itkän waqıtta säğatenä 842 kilometr tizlek belän vertikal’ töşügä küçä häm minutlar êçendä cirgä kilep bärelä.

Qurqınıçsızlıq kameralarınıñ internetta çıqqan videolarında da oçqıçnın borını belän cirgä taba oçuı kürenä.

Oçqıçnın marşrutı, tizlege häm biyeklege şikelle oçış mäğ’lümatları terkälgän qara ärcä tikşerü öçen Boingnı çığaruçı Amerika Quşma Ştatlarına cibärelä. Kabinadağı tawışlarnı terkäwçe qara ärcäne isä Qıtayda tikşerälär.

Qıtay grajdanlı aviaśiyä idaräse 20nçe aprel’dä çığarğan berençel xisabında oçış kontrol’ häm xäräkätne küzätü caylanmalarında xilaflıq çıkmawın belderde.

Aviaśiyä belgeçläre oçqıçnıñ marşrutındağı kisäk yasalğan üzgäreş, töşü tizlege häm hälakättän alda bernindi aşığıç xäl signalı birelmäwe säbäple qazanıñ keşe qulı belän tormışqa aşırılğan bulu ixtimalın farazladı.