Taliban liderına xezmät xaqı bilgelände

Äfğanstanda Taliban xakimiyäte däwlät xezmätkärläreneñ tüläwlärenä tözätmälär kertte

1743154
Taliban liderına xezmät xaqı bilgelände

Äfğanstanda Taliban xakimiyäte liderları mulla Xibätulla Axunzadägä aylıq 228 meñ 750 afgani (yaqınça 2 meñ 400 dollar) xezmät xaqı bilgeläde. Waqıtlıça xökümätneñ baş ministr wäkile Möxämmät Xässän Axund isä 198 meñ 250 afgani (yaqınça 2 meñ 60 dollar) alaçaq. Ministrlarnıñ xezmät xaqları – 137 meñ 250 afgani (yaqınça 1 meñ 430 dollar).

Finans ministrlığı süzçese Äxmät Wäli Xakmal bu xaqta yasağan belderüendä däwlät xezmätkärläreneñ tüläwläre belän bäyle tözätmälär yasaluın äytte.

Anıñ nigezendä, gubernatorlarğa aylıq 91 meñ 500 afgani (yaqınça 950 dollar) xezmät xaqı bilgelängän.

Süzçe Äxmät Wäli Xakmal ildä minimal’ xezmät xaqınıñ 5 meñ afgani (yaqınça 52 dollar) bularaq raslanuın da citkerde.

Matbuğatta ber genä fotosuräte bulğan Taliban liderı Axundzadäneñ qayda ikänlege tögäl genä bilgele tügel.

Äşräf Gani liderlığındağı êlekkege xakimiyät waqıtında ilbaşı sarayında êşläwçe kiñäşçelärneñ xezmät xaqları 3 meñ belän 7 meñ dollar arasında ide.



Bäyläneşle xäbärlär