İlon Mask Bill Geytsnı uzıp kitte

Êlektr avtomobile çığaruçı Teslanıñ xucası İlon Mask dön’yadağı iñ bay keşelär isemlegendä ikençe urınğa mende. Ul Maykrasoftqa nigez salğan Bill Geytsnı uzıp kitte.

Bloomberg milliarderlar indeksına qarağanda, Tesla akśiyäläreneñ 6,5%qa üsüe näticäsendä êşmäkärneñ mölkäte ber köndä 7 milliard 200 million dollarğa artqan häm 127 milliard 900 million dollarğa citkän.

49 yäş’lek Mask bu yıl başınnan birle üz baylığına 100 milliard 300 million dollar östäde.

Texnologiyä şirkäte Maykrasoftqa nigez salğan Bill Geytsnıñ milege isä 127 milliard 700 million dollar.

Amerikanıñ “Amazon” firması xucası Djeff Bezos 182 milliard dolları belän dön’yadağı iñ bay keşe bularaq terkälde.

Bloomberg milliarderlar indeksı akśiyälär, küçemsez milek, sänğat’ ob’yektları häm başqa lyuks mölkät şikelle cämäğat’çelekkä açıq mäğ’lümatlarnı qullanıp isemlek tözi.