Jeneva avtomobil’ kürgäzmäse 2021nçe yılda da bulmayaçaq

Oyıştıruçılar 1905nçe yıldan birle uzıp kilüçe çaranıñ ğamäldän çığarıluın citkerde

1446135
Jeneva avtomobil’ kürgäzmäse 2021nçe yılda da bulmayaçaq

Dön’yada üz tarmağında iñ ähämiyätle häm däräcäle sanaluçı Jeneva avtomobil’ kürgäzmäse koronavirus kizüe arqasında 2021nçe yılda da bulmıy. Oyıştıruçılar anıñ ğamäldän çığarıluı turında belderü yasadı. Alar kürgäzmädä qatnaşuçı firmalar arasında soraştıru ütkärgän. Avtomobil’ şirkätläreneñ kübese Kovid-19 kizüe säbäple 2021nçe yıldağı kürgäzmäneñ ğamäldän çığarıluı yaqlı buluın beldergän.

Çaranı oyıştıruçı waqıf idaräse, anketa näticälären iğ’tibarğa alıp, kürgäzmäne ütkärmäskä qarar qıldı. Belderüdä avtomobil’ citeşterü tarmağınıñ xäzerge waqıtta awır çor kiçerüe häm qatnaşuçılarğa kizü yoğıntısınnan qotılu öçen waqıt kiräk buluı äytelä.  Monnan tış, anda “Xäzerge sälamätlek saqlaw şartları kiläse yazda 600 meñnän artıq zıyarätçe häm 10 meñ jurnalistnı qabul itäçäk çara öçen uñay tügel” digän yullar da bar. Oyıştıruçılar kürgäzmäneñ 2022nçe yılda uzaçağına ömet belän qarıy.

Jeneva avtomobil’ kürgäzmäse bıyıl 5-15nçe mart könnärendä uzası ide. Ul koronavirus arqasında bulmıy qaldı.

Çara berençe tapqır 1905nçe yılda ütä. 1924nçe yıldan ul xalıqara isemen ala. Jeneva avtomobil’ kürgäzmäseneñ 88nçesendä Törkiyä şirkätläre dä qatnaşa.



Bäyläneşle xäbärlär