Koronavirus arqasında kongress cıyılmıy

Mobil’ bötendön’ya kongressı bıyıl koronavirus arqasında uzmayaçaq. Kizüdän qurqıp 40qa yaqın mobil’ texnologiyälär şirkäte aña kilüdän baş tarttı. Çara 24nçe-27nçe fevral’dä İspaniyäneñ Barselona şähärendä uzarğa tiyeş ide.  

İspaniyä xökümäte kongressnı ğamäldän çığaru öçen bernindi sälamätlekkä yanarlıq säbäp yuq dip çaqırıp qaradı, ämma iñ zur texnologiyä firmaları ber-ber artlı kilmäyäçägen belderde. Alar bügenge wäzğıyät’tä kongressnı uzdırunıñ mömkin bulmawın citkerä: yaña tör koronavirus belän bäyle xäl bik tiz räweştä üzgärä.

 Xezmätkärlär häm kliyentlarnıñ iminlegen säbäpçe kürsätep kongressta qatnaşmayaçağın iğ’lat itkän şirkätlär isemlegenä kiçä Rakuten, Doyç Telekom, Vodafone, Britiş Telekom häm Nokia da östälde.

Aña qadär Kovid-19 kizüe arqasında LG, Ericsson, Nvidia, Amazon, Sony, Intel häm Facebooknı da kertep distälägän tanılğan firma Mobil’ bötendön’ya kongressında qatnaşmaw qararı çığarğan ide.