"Moña qadär kürelmägän iq'tisadi qıyınlıqlar"
Merkel' böten Awrupanıñ awır xäldä buluın söyläde
Germaniyä kanślerı Angela Merkel’ koronavirus kizüe arqasında monnan alda hiç kürelmägän iq’tisadi awırlıqlarğa duçar buluların söyläde. Ul başqala Berlin yanındağı Merseberg sarayında Franśiyä ilbaşı Êmmanuêl’ Makron belän oçraştı. Soñınnan alar urtaq matbuğat cıyılışı uzdırdı.
“Ber yaqtan pandemiyäneñ üzen, ikençe yaqtan, anıñ belän bäyle räweştä distälägän yıllar, bälki tağın da kübräk, kürelmägän iq’tisadi qıyınlıqlar kiçeräbez. Germaniyädä dä, Franśiyädä dä, Awrupa Berlegendä dä,”-dide Merkel’.
Ul Germaniyä belän Franśiyäneñ Awrupa Berlege illäre öçen bergä iq’tisadi qıyınlıqlarnı ciñü maqsatı belän qotqaru fondı täq’dim itülären xäterlätte. “Bez monıñ belän “Awrupa kiläçägebez” didek. Barıbız törle illärdän, ämma bergä köçle bula alabız. Śifrlaşu, klimat, suğış häm solıx şikelle awır mäs’älälärdä dön’yada rol’ uynıy alabız,”-dip söyläde kanśler.
