Qıtaydan kilgän bitleklär saqlamıy...

Niderland Qıtaydan satıp ağlan 600 meñ bitlekne kire cıyıp ala. Alarnıñ tiyeşle standartlarğa cawap birmäwen belderälär. İl Qıtaydan barlığı 1 million 300 meñ bitlek ağlan bulğan.

Niderland däwlät teleradiokompaniyäseneñ internet säxifäsendäge belderüdä äytelgänçä, ilneñ sälamätlek saqlaw, sośial’ üseş häm sport ministrlığı Qıtaydan bitlek alunı tuqtattı häm xalıqqa taratılğan 600 meñen kire cıyıp ala.  Monnan soñ importlanaçaq bitleklär östämä test aşa uzaçaq.

Qayber xastaxanälär taratılğan bitleklärneñ sıyfatınnan şöbhälänä häm Niderland fänni-ğamäli tikşerenülär oyışmasına möräcäğat’ itä. Belgeçlär êşlänmälärneñ qurqınıçsızlıq häm sälamätlek standartlarına turı kilmäwen, koronavirusnıñ sulış yullarına ütüen totqarlamawın açıqlıy.

Xatalı bitleklärneñ niqadäreneñ qullanıluı belän bäyle tögäl genä mäğ’lümat yuq. Qayber xastaxanälärneñ citmäwçelek arqasında iske bitleklären dezinfekśiyäläp qabat qullanuı citkerelä.