Teslanıñ Germaniyädäge êşxanäsen tözü tuqtatıldı

Amerika êlektrlı avtomobil’ şirkäte Teslanıñ Germaniyädä tözergä planlaştırılğan Gigafaktori êşxanäse xäzerlekläre mäxkämä qararı belän tuqtatıldı.

Teslağa qarşı däğ’wanı êkologlar açqan. Alar ob’yektnıñ başqala Berlin tiräsendäge ber urman mäydanında qorıluı säbäple cirlektä tabiğıy yäşäm häm su çığanaqlarına tiskäre yoğıntı yasayaçağın belderä.

Şirkät bu prośess barışında urmandağı ağaçlarnı kisä başlağan bulğan inde.

Mäxkämä, kiçä qarar çığarıp, Teslanıñ êşçänlegen däğ’wa tögällängä qadär waqıtlıça tuqtattı.

Tözelergä tiyeşle ob’yekt şirkätneñ Awrupadağı täwge avtomobil’ häm akkumulyator êşxanäse bulaçaq.

Gigafaktori turında Tesla idaräçese Êlon Mask noyabr’ ayında beldergän ide.

Mäs’älä ul könnän birle ildäge êkologlar belän ike partiyäneñ qaynar bäxäslärenä säbäp buldı. Xristian demokrat häm Xör demokrat partiyäläre fikerençä,  Teslağa qarşı çığu Germaniyäneñ “şirkätlär öçen uñaylıqlar tudıruçı il” imidjına zarar birergä mömkin.

Tesla êşxanä öçen däwlät dairälärennän kiräkle raslawlarnı älegä almağan. Ämma Germaniyä êkologiyä ministrlığı şirkätkä xäzerleklärne başlarğa röxsät itkän. Älege qısalarda 91 gektar mäydandağı urmanda ağaçlarnıñ kiselüe êkologlarnıñ açuın qabarta.

Tesla töbäktä 400 futbol qırınnan zur bulğan 300 gektar cir satıp aldı häm tözeleşne 2021nçe yılda tögällärgä planlaştıra ide.