Törek balı qaya kitä?

Törkiyäneñ balı bıyılnıñ 7 ayında dön’yanıñ här tarafına cibärelde.

Könçığış Qara diñgez regionı êksportyerlar berlege mäğ’lümatlarına qarağanda, ğıynvardan iyül’gä qadär 2 meñ 945 tonna bal satılğan. Ul 12 million 857 meñ dollar kerem kitergän.

Bal êksportında berençe urında Germaniyä. Alarğa 3 million 721 meñ dollarlıq tatlı tovar satılğan. Bu 1 meñ tonnadan artıq bal digän süz. Törkiyädän bal aluçılar isemlegendä ikençe urında -AQŞ. Öçençedä - Soğud Ğaräbstanı.  

Bıyıl törek balın yaratuçılar isemlegenä tağın berniçä il östalde. Qıtay, Bolgariyä, Liviyä, Şveśiyä, Berläşkän Ğaräp Ämirlekläre, Greśiyä, Mongoliyä, Äfğanstan häm Marokko da älege faydalı azıqnı Törkiyädän kertä başladı.