Antaliyağa iñ küp qaysı ildän turist kilä?

Qoyaş, qom häm yar buyları belän bergä tarixı, tabiğate häm mädäniyät qıymmätläre belän dönyanıñ dürt ber yağınnan turist cälep itüçe Antaliyada sezon tiz başladı.

Antaliya gubernatorı Ärsin Yazıcı şähärneñ cäyge sezonğa äzer buluın belderde.

Şähärgä kilü külämeneñ arta başlawın citkerüçe Yazıcı bıyılğı turist sanı häm kerem külämeneñ yuğarı buluın kötülären iskärtep uzdı.

24nçe fevral’dän birle däwam itüçe Rusiyä-Ukraina suğışına qaramastan şähärdäge turizm xäräkätlelegeneñ häm antaliyalılarnı häm dä tarmaqnı şatlandıruın äytüçe Yazıcı: "Yaqınça ber ay buyı könenä 25 meñ belän 30 meñ arasında çit il turistı kilde, atna axırında bu san ber köndä 40 meñgä, 45 meñgä citä,” – dip belderde.

Vilayät başlığı Yazıcı bıyıl şähärgä kilgän turistlarnıñ millätlärendä dä üzgäreşlär buluına iğ’tibarnı yünältte.

Şähärgä turist cibärgän illär isemlegendä uzğan yılda 40% tiräse turist belän Rusiyäneñ berençe urında buluın, Ukraina turistlarınıñ isä yaqınça 14% belän ikençe urında toruın xäterlätüçe Antaliya gubernatorı Germaniya, Pol’şa häm Angliyanıñ isä berençe bişlektä buluın iskärtep uzdı.

Bıyıl isä isemlekneñ tulısınça üzgärüenä basım yasawçı Yazıcı:

"Bıyıl kilgän turistlarnıñ 29,5% Germaniyadan, 13,5% Angliyadan, 13% tiräse Rusiyädän, 6,40% Niderlandtan, 4% tiräse dä Pol’şadan. Ukrainadan kilgän qunaqlarıbız tabiğıy bularaq azaydı. Läkin Awrupadan häm Tön’yaq Awrupadan kilüçelär arttı. Germaniyadan häm Angliyadan kilüçelärneñ artuınnan tarmaq bik qanäğät. Suğışqa qaramastan yaxşı sezon kötäbez,” – dide.