Mariya-Antuanettanıñ kol'yesı rekord bäyägä satıldı

Şveyśariyäneñ Jeneva şähärendä oyıştırılğan aukśionda Franśiyä patşabikäse Mariya-Antuanettanıñ “ênce häm almaz” kol’yesı 32 million Şveyśariya frankına (yaqınça 175 million lira) satıldı. Satıp aluçı isemen belderergä telämägän. Kol’yenıñ bazar bäyäse 1-2 million frank bularaq isäplänä.

“Hiçşiksez, iskitkeç satu, çönki tarixta ber kol’ye dä mondıy bäyägä satılmadı. Bik bäxetle bez. Bu, älbättä, mondıy tör zärqan êşlänmäläre öçen yözyılnıñ säwdäse,”-dide aukśion yortınıñ Awrupa öçen cawaplı wäkile Daniêla Masketti. Anıñ äytüençä, Mariya-Antuanettanıñ näseldän näselgä miras bularaq tapşırılğan cäwhärläre 200 yıldan soñ täwge tapqır bazarğa çıqtı.

Aukśionğa Franśiyäneñ soñğı patşabikäseneñ ênce, almaz kol’yeları, alqa, muyınsa häm broşka şikelle 10 danä zärqan êşlänmäse çığarıldı.  Alar toplam 53,5 million frankka satıldı. Aukśion yortı wäkile Dêvid Bennett bu sannıñ moña qadär bulğan patşa ğailäse zärkan êşlänmäläre satışında rekord ikänen belderde.

Franśiyä patşası 16nçı Lyudovikka kiyäwgä çıqqan Mariya-Antuanetta zinnätle tormışı häm üleme belän franśuz inqıylabınıñ iñ onıtılmas isemnärennän. Anıñ 1793nçe yılda 37 yäşendä Parijnıñ Konkord mäydanında başın çabıp özdelär. Patşabikäneñ tormışı bik küp fil’m häm kitapta urın aldı.