Misırda böcäk mumiyläre tabıldı

Misırnıñ Giza şähärendäge arxeologik qazınular waqıtında irtäñge qoyaş täñrese Xeprinıñ simvol böcäge mumiyäse tabıldı. Borıñğı misırlılar tires qoñğızınıñ izge buluına ışanğan. Alar qoyaş täñreseneñ şul formağa kerüen uylıy.  

Sakkara arxeologik ob’yektı mäydanındağı qazınular näticäsendä bik küp tarixi äsär tabıla. Tires qoñğızı mumiyäse - şularnıñ berse. Anıñ turında Misır tarixi äsärlär ministrı Xälid äl-Anani, tarixi äsärlär yuğarı idaräse särqatibe Mostafa Väziri qatnaşındağı matbuğat kiñäşmäsendä söylädelär.

Anda äytelgänçä, koñğız mumiyäse Misır ğına tügel, dön’yada siräk oçrıy torğan açışlarnıñ berse. Väziri törle illärdäge bik küp muzeylarğa şaltıratıp, moña oxşaş êksponat turında soraşuların söyläde. Cawap itep, böcäk mumiyäse tügel, tabutı barlığın beldergännär.

10nçı aprel’dä başlanğan qazınular barışında ber sandıq êçendä 200 tires qoñğızı, başqa sandıqta 2 böcäk, pesi häm yılan mumiyäläre belän firğawennärneñ ülelär kitabı telgä alınğan papirüs käğaz’läre tabılğan.

 Ministr Anani beldergänçä, şul uq cirlektä arıslan häykäle häm 7 firğawenneñ qabere tabılğan.