Sarayevoda mäşhür keşelär cıyıldı

Bosniyä-Gerśegovinada bıyıl 25nçe tapqır Sarayevo fil’m festivale uza. Ul tantanalı räweşta açıldı.

İldä 1990nçı yıllarda bulğan suğışnıñ êzlären sörtü häm başqala Sarayevonı qabat mädäniyät-sänğat’ üzäge xälenä kiterü maqsatı belän uzdırıluçı festival’gä bıyıl bersennän-bese mäşhür qunaqlar kilgän. Alar yöriyäçäk qızıl kelämne isä 25 yıllıq yubiley uñayınnan bosniyälelärneñ milli motivların kertep xäzerlägännär.   

Festival’ qısalarında birelüçe “Sarayevonıñ yöräge” maqtawlı bülägenä bıyıl Oskarlı ike isem täq’dim itelde. Meksikalı rejissyer, prodyuser häm sśenarist Alexandro Gonsales İnarritu häm polyak rejissyer Pavel Pavlikovski büläklärne Purivatranıñ qulınnan qabul itep aldı.   

Pavlikovski üz çığışında Sarayevoğa kilüe öçen qanäğat’ buluın belderde. “Sarayevo awırlıqlarğa qaramastan qıyu häm köçle yöräkle. Bu festival’ isä ul yöräkneñ ber tibeşe,”-dide ul.

İnarritu da festival’gä çaqırıluı öçen söyenüen söyläde. “Sarayevoğa kilergä küptän teli idem. Bügen bu xıyalım tormışqa aştı. Bu qıyulıq häm söyü tulı şähär,”-dide rejissyer.

Açılış tantanasınnan soñ Bosniyä-Gerśegovina rejissyerı İnes Tanoviçnıñ “Uğıl” fil’mı prem’yerası buldı.

Festival’neñ büläkläre öçen bıyıl 9 ozın metrajlı, 14 qısqa fil’m, 16 dokumental’ äsär häm 14 öyränüçe fil’mı - barlığı 53 icat êşe yarışa. Aralarında 4 törek kartinası da bar.

Festival’ 23nçe avgustqa qadär däwam itäçäk.