Ärdoğan kabinet cıyılışınnan soñ belderülär yasadı

Törkiyä ilbaşı Räcäp Tayyip Ärdoğan kabinet cıyılışınnan soñ belderülär yasadı häm ilneñ kizü belän köräştä uñışlı ürnäk kürsätüen, yoqtıru oçraqları häm ülem sanında qabat asqa taba töşü küzätelüeneñ quandıruçı buluın söyläde.

Ul kürsätkeçlärne tağın da tübänäytü öçen çikläwlärneñ äle däwam itäçägen äytte.

İlbaşı Ayasofiyanıñ ğıybadät öçen açıluı mäs’äläsenä dä tuqtaldı. Ul anıñ çirkäwdän tügel, muzeydan mäçetkä äwerelderelüen xäterlätte.

“Xaräbä xälendä bezneñ qulğa kergän Ayasofiya mäçete äsär xälenä kiterelde,”-dide ul häm binanıñ mädäni miras statusınıñ saqlanaçağın assızıqladı: “Ayasofiyanı da kertep, millätebezneñ bäysezlege häm xoquqları belän bäyle mäs’älälärdä qararlarıbıznı üzebez qılaçaqbız”.

Ärdoğan Awrupadağı mäçetlär sanınıñ Törkiyädäge başqa din ähelläreneñ ğıybadätxanäläre sanınnan 4-5 tapqır azraq buluına iğ’tibarnı cälep itte. Ul Törkiyäneñ ikele standartlarğa duçar buludan qotıla almawın äytte.

Ärdoğan dus häm qardäş Azärbaycanğa höcüm turında da süzen äytte. Ul bu waqıyğağa böten küñele belän rizasızlıq belderüen citkerde. “Barlıq mömkinleklärebez belän Azärbaycannıñ yanında bulaçaqbız,”-dide ilbaşı.

Ärdoğan Tawlı Qarabaxnı basıp aludan birle däwam itüçe kiyerenkelekneñ Ärmänstannıñ duamal häm sistemalı höcümnäre arqasında bäreleşkä äwerelä aluına borçıluların äytte.

“Bu höcüm Ärmänstannıñ çiklärennän çığuçı waqıyğa. Maqsat Tawlı Qarabaxnıñ çişeleşen kirtäläw häm yaña bäreleş mäydannarın barlıqqa kiterü,”-dide Ärdoğan.