Ärdoğan tizdän Süriyädä operaśiyä başlanacağı turında xäbär itte

Ul Süriyäne PKK terrorçılarınnan çistartu dàwam itäçäge xaqında söyläde

1203031
Ärdoğan tizdän Süriyädä operaśiyä başlanacağı turında xäbär itte

Törkiyä ilbaşı Räcäp Tayyip Ärdoğan tizdän Süriyädä operaśiyä başlanacağı turında xäbär itte. Ul PKK terrorçı oyışması höcümnäre astında bulğan cirleklärgä ber tönne sizdermiçä kilep kiräkle çistartunı başqaraçaqların söyläde.

Ärdoğan İstanbulda iftar programmasında êçke iminlek berämlekläre belän oçraştı. Andağı çığışında ilbaşı operaśiyä säyäsäte belän terrorçılarğa zur zıyan saluların belderde. “Barı tik sonğı 2 yıl yarımda 420 yuğarı däräcäle terrorçını täêsirsez xälgä kiterdek. Alarnıñ 16sı qızıl isemlektän. Oyışmağa kerüçelärneñ sanında häm terrorçılarnıñ çaralar külämendä ähämiyätle artqa kiteş sizelä,”-dide ul.  

Ärdoğan belderüençä, könçığış häm kön’yaq-könçığış Anadolu töbäklärendä ozın yıllardan soñ qabat tınlıq häm tınıçlıq urnaştırıla, terrorçı oyışmanıñ oyasına äwerelgän tawlarğa iminlek köçläreneñ fidakar’lelege arqasında qabat yaz kilä. Ul terrorçılarğa logistika yärdäme kürsätüçe häm alarnı qoral belän täêmin itüçe barlıq êlementlarnıñ çığanağın qorıtu öçen Süriyä häm Ğıyraqtağı xäräkätlärgä tizlek birelüen añlattı.  

“Süriyä mäydanındağı operaśiyälär belän DEAŞ häm separatist terrorçı oyışmanıñ bu ildäge äğ’zalarına bik awır bäreleşlär oyıştırdıq. 4 meñ kvadrat kilometrdan artıq mäydannı terrorçılardan çistartıp, Süriyäneñ tön’yağın, äyterseñ, xozur utrawına äwerelderdek,”-dide ul.

Ärdoğan Süriyädäge suğıştan qaçıp Törkiyägä sıyınğan 3 million 600 meñ möhacirdän 320 meñeneñ qabat watannarına kire qaytu mömkinlege aluın söyläde häm tizdän başqa töbäklärgä dä sizdermiçä kilep çistartu ütkäreläçägen assızıqladı.  



Bäyläneşle xäbärlär