Avtobus belän şähärlärara säyäxät öçen röxsät alınaçaq
Êlemtä başlığı Fahrettin Altun yaña tör koronavirusnıñ (“Kovid-19”nıñ) taraluın totqarlaw maqsatınnan çığıp kürelgän yaña çaralarnıñ urtaq saqlanunı tağın da köçäytäçägen belderde
Altun “Twitter”dan inglizçä urtaqlaşqan yazuında İlbaşı Räcäp Tayyip Ärdoğannıñ koronavirusqa qağılışlı yaña çaralarnı açıqlawın xäterlätte.
"Bu yanaw başlanğannan birle şaqtıy täêsirle çaralar kürdek häm bügenge östämä çaralar da urtaq saqlanuıbıznı tağın da köçäytäçäk”, - dip äytüçe Altun bügen ğamälgä kertelgän çaralar arasında cämäğät transportına, irekle êşläw grafiğına, cämäğät urınnarına, buş waqıttağı êşçänlekkä qağılışlı küp sanda çaranıñ buluın belderde.
Altun kürelgän çaralar qısalarında zaruri bulmağan şähärlär arasındağı säyäxätlärgä çikläwlärneñ kiterelüen, şähärlär arasında avtobus belän säyäxät öçen vilayät idaräsennän röxsät alırğa kiräk bulaçağın assızıqlap äytep uzdı.
Xalıqara säyäxätne uzğan könnärdä berniçä säfär belän çikländerülären xäterlätüçe Altun bügennän başlap isä böten xalıqara oçışlarnı (aviareyslarnı) tuqtatuların häm barlıq şuşı çaralarnıñ 30 zur şähärdä tulısınça ğamälgä kerüen belderde.
Altun: “İlbaşıbız böten watandaşlarıbızdan şuşı çaralarnı iğ’tibar belän ütäwlären häm üzlären karantin astına aluların teläde. Xalqıbıznıñ şuşı qağidälärne sabırlıq häm iğ’tibar belän ütäwe – bu oxşaşı kürenmägän yanawnı ciñüebezne ciñeläytäçäk”, - dip äytte.
