"Ayasofya statusı belän bäyle soñğı qararnı birüçe törek milläte, başqalar tügel"

İlbaşı Räcäp Tayyip Ärdoğan Ayasofyanıñ qabat mäçet bularaq ğıybadätkä açıluınıñ Törkiyäneñ êçke mäs’äläse buluın söyläde. Ul “Kriter” jurnalı öçen interv’yusında könüzäk temalarğa fikeren belderde.

Ärdoğan söylägänçä, Fatix soltan Mäxmät İstanbulnı cinep alğannan soñ Ayasofyada berençe comğa namazın qılğan häm ciñüneñ simvolı bularaq anı mäçetkä äwereldergän. Ul tarixi qıymmätneñ cämäğat’çelek xäterendäge urınınıñ baş tartılmas buluın citkerde.  

Ärdoğan 1934nçe yılda Ayasofyanıñ muzeyğa äylänüen millätneñ küñelen sızlatuçı qarar dip atıy.  “Ayasofyanıñ qabat möhim üzençälegenä kire qaytuı kiräk ide. Yuğarı mäxkämä ğarizabıznı qarap näticä çığardı.  Ayasofya statusı belän bäyle soñğı qararnı birüçe törek milläte, başqalar tügel. Bu bezneñ il êçendäge mäs’äläbez. Başqa illär isä qararıbızğa xörmät belderä genä ala,”-dide ul.

Ärdoğan Liviyadağı säyäsi krizisqa da bäyä birde. Ul tüntäreleşçe Xafter häm yärdämçeläreneñ basıp alu planı barıp çıqmawın äytte.

Ärdoğan Törkiyä belän Liviyä arasındağı kileşüne xäterlätte häm, anıñ yärdämendä, Törkiyäneñ Urta diñgezneñ könçığışındağı xoquq häm mänfäğat’lären garantiyäläwen, şul uq waqıtta liviyäle qardäşlärgä teräk buluın citkerde. Ul älege ilneñ totrıqlılıqqa ireşüeneñ barı üz xalqı öçen genä tügel, böten regionnıñ faydasına buluın assızıqladı.  

“Älege däwlätneñ säyäsi häm iq’tisadi yaqtan köçäyüe Tön’yaq Afrikanı da, Awrupanı da tınıçlandıraçaq. Xalıqara cämäğat’çelek qanunlı xökümätkä yärdäm itep üzeneñ kemgä östenlek birüen kürsätergä, suğış cinayät’läre êşlägän tüntäreleşçelärne tuqtatırğa tiyeş. Liviyäne qan külenä äwereldergän legionerlarnıñ tiz arada ildän çığarıluı kiräk. Tärxunä häm tağın berniçä şähärdä tabılğan kümäk qaberleklär öçen tüntäreleşçelär hiçşiksez cawapqa tartılırğa tiyeş,”-dip söyläde Törkiyä ilbaşı.