Dön'yanıñ iñ yaxşı balı - Törkiyädä

Törkiyäneñ Êğriçayır balı dön’yada iñ yaxşısı dip saylandı. Bu xaqta Kanadanıñ Monreal’ şähärendä 8nçe-12nçe sentyabr’dä uzğan 46nçı Bötendön’ya umartaçılıq kongressında belderelde.

İñ yaxşılarnı açıqlaw häm büläkläw tantanası cıyılışnıñ soñğı könendä üyye. Yuğarı isemgä layıq dip tabılğan Êğriçayır balı şirkäteneñ iyäse Cälal Çay belderü yasap bolay dide: “Märsin cirlegendä umartaçılıqnıñ organik êşlänmälären citeşteräbez. Ğailäbezneñ umartaçılıq tradiśiyäläre 300 yıldan artıq däwam itä häm babaylardan onıqlarğa küçep kilä”.

Cälal Çay - älege näselneñ soñğı buını. Ul ğailä biznesın yaña ürlärgä çığaru uyı belän yana. “2009nçı yıldan birle Êğriçayır balı belän törle yarışlarda qatnaşabız. Organik êşlänmälärebez 2013nçe yılda Ukraina başqalası Kiyevta uzğan bötendön’ya umartaçılıq berläşmäse çarasında - kömeş, ä 2017nçe yılda İstanbulda altın medal’ aldı,”-dip söyli ul.  

Kongressta Törkiyäneñ Monreal’ baş konsulı Barkan Umruk ta qatnaştı. Ul tuğan ile umartaçılarınıñ êşçänlege näticäse belän ğorurlanuın yäşermi. “Umartaçılarıbız 4 fasılğa häm bay florağa iyä bulğan ilebezneñ tabiğıy mömkinleklärennän iñ yaxşı räweştä faydalana alğan. Şirkätneñ 46nçı Bötendön’ya umartaçılıq kongressında altın medal’ yawlawı häm dön’yanıñ iñ yaxşı balı bularaq kubok aluı bezne şatlandırdı häm maqtanırlıq säbäp birde,”-dip söyli konsul.