“Möselman da, xristian da – ışanuçı härkem kerä alaçaq"

Törkiyä ilbaşı idaräse süzçese İbrahim Kalın Ayasofyanı ğıybadät öçen açu qararın dön’ya mirasın yuqqa çığaru belän tiñ kürüçelärneñ xaqlı bulmawın assızıqladı. Ul bu xaqta BBC häm TRT World kanallarında söyläde.

Kalın Ayasofyada möselman, xristian, buddist – dinenä qaramastan, härkemneñ kerä aluın belderde. Anıñ fikerençä, mäçetne ğıybadät öçen açu qararında cämğıyät’, oppoziśiyäne dä kertep, konsensusqa bardı.  

Süzçe qararnı dön’ya mirasın yuqqa çığaru bularaq tänqıyt’läwçelärneñ xaqsız buluın assızıqladı häm din iregenä kilgändä, Törkiyädä 400dän artıq çirkäw häm sinagoganıñ açıq buluın äytte. Ul qararnıñ İstanbuldağı mäçet sanı belän tügel, Ayasofyanıñ tarixi häm dini ähämiyäte belän bäyle buluın belderde. “Möselman da, xristian da – ışanuçı härkem kerä alaçaq, berkem öçen çikläw yuq”,-dide Kalın.

İbrahim Kalın êlekkege Şveśiyä xökümäte räise Karl Bil’dtneñ Ayasofya belän bäyle fikerlärenä Twitter aşa cawap birde. Ul Awrupanıñ Törkiyä turındağı xäzerge qaraşlarınıñ kübeseneñ ütkändäge xorafatlar häm yuq-bar borçularğa nigezlänüen citkerde. “Tigezlek, ber-berebezgä xörmät häm urtaq mänfäğat’lär mönäsäbäten däwam itü barıbız öçen dä faydalı,”-dide Kalın.