Shri Lankada sodir bo'lgan portlashlarda qurbonlar soni 290 kishiga yetdi

Kecha, 21 aprel yakshanba kuni Shri Lankada turli katolik cherkovlarida va mehmonxonalarda Pasxa bayrami munosabati bilan o’tkazilayotgan marosimlarda sodir etilgan 8 ta portlash oqibatida halok bo‘lganlar soni 290 nafarga yetdi.

Huquq-tartibot organlari ma'lumotlariga ko‘ra, hujumlarning deyarli barchasi xudkush-terrorchilar tomonidan sodir etilgan.

Tekshiruvlarda aniqlanishicha, portlashlarni sodir etishda jami 7 nafar xudkush-terrorchi ishtirok etgan.

Bu haqda Shri Lanka sud-medekspertiza markazi xodimi Ariyananda Velinga ma’lum qildi.

Uning ta’kidlashicha, kecha tongda cherkov va mehmonxonalarda sodir etilgan 6 ta teraktni 7 nafar xudkush-terrorchi sodir etgan.

Uning so’zlariga ko’ra, voqea joyidan to’plangan jasad bo’laklari ustida olib borilgan medekspertiza tekshiruvlarida teraktlar xudkush-terrorchilar tomonidan sodir etilganligi aniqlangan.

Mehmonxona va cherkovlarda xudkush-terrorchilarning jasadlaridan bo’laklar topilganligini ma’lum qilgan Velinga, poytaxt Kolombo yaqinlaridagi so’ngi portlash joyida tekshiruv davom etganligini bildirdi.

Eslatma: Kecha Shri Lankada sodir bo’lgan 8ta teraktda qurbonlar soni 290 kishiga yetdi. 500dan ortiq kishi tan jarohati olgan.