Қазақтың зергерлік өнері
Қазақтың халықтық зергерлік өнері ұлттық мәдениет тарихынан ерекше орын алады.
27 Haziran 2021 00:32
Зергерлік өнердің жасалу ерекшелігіне тән кәсіптік мінездемесі бар.
Қазақ зергерлері көбінесе жеке-дара жұмыс істеп, жасалу жолын, қыр-сырын ұрпақтан-ұрпаққа жеткізіп отырған. Зергерлер заттарға өте үлкен әсемдік беру үшін көбінесе алтынды, күмісті пайдаланған.
Зергерлердің аса көп жасайтыны — әйелдердің әшекей бұйымдары. Қазақ әйелдері кеуделеріне алқа, құлақтарына сырға, шаштарына шолпы, білектеріне білезік, саусақтарына жүзік таққан.
Бір-біріне үзбелеп бекітілген үлкенді-кішілі өрнекті алқалардан құралатын салмақты да салтанатты өңіржиектер аса көз тартарлық әсем болады. Қатар-қатар тізбектелген тастар қондырылып жасалған тамақ алқа асыл матамен әдіптеледі Ал інжу-маржан қадалған тамақшалар — қыздар жиі тағатын бұйымдар.
Кеудеге тағылатын әшекейлер қатарына түрлі-түсті, сәнді түйреуіштерді, асыл тасты тұмарларды, небір қымбат тастармен безендірілген таналар мен күмістен соғылған түймелерді, ілгешектерді жатқызуға болады.
Әйелдердің әшекейлері, киім-кешекке тағатын түрлі сәндік бұйымдар, ас-су жабдықтары, жиһаздар, ыдыс-аяқтар, теріден, ағаштан жасалған ыдыстар, музыкалық аспаптар, қару-жарақтар, ат-тұрман әбзелдері секілді дүниелердің барлығын қолөнершілер жасап отырған.