Merkezi Aziýanyñ iñ uly sport toplumy: Aşgabat Olimpiýa şäherçesi

Aşgabat şäherinde gurlan Olimpiýa şäherçäniñ umymy meýdany 1.466.400 m2.

17 Eylül 2021 19:59

Aşgabat şäherinde gurlan Olimpiýa şäherçesi, sebitiň iň uly toplumy bolup 30-dan gowrak dürli desgany, şol sanda ýaşaýyş-durmuş, ulag we beýleki üpjünçilik ulgamlaryny öz içine alýar. Bu desgalaryň umumy bahasy ABŞ-nyň 5 milliard dollaryna barabardyr . Bu şäherjigiň gurluşygy üç tapgyrda amala aşyryldy.

Olimpiýa şäherçesiniñ Olimpiýa suw toplumy 2016-njy ýylda dünýäde “iň uly suw sport toplumy” hökmünde Ginnesiň dünýä rekordlar kitabyna girizildi.

Şeyle-de 2017-nji ýylda Aşgabat şäherinde geçirilen Ýapyk binalarda we söweş sungaty boýunça   V Aziýa oýunlarynyň açylyş hem-de ýapylyş dabaralaryny kabul eden 45 müň tomaşaçylyk Aşgabat Olimpiýa stadiony dünýäniň iň gowy stadionlaryň dalaşgärleriniň sanawyna goşuldy.  2017-nji ýylda Aşgabat Olimpiýa stadionynyň ýokarsynda gurlan Ahal-teke bedewiniň kellesi dünýäde iň uly at kellesi şeklindäki heýkel hökmünde Ginnesiň dünýä rekordlar kitabyna girizildi.

Sportuň oýun görnüşleriniň toplumy

Bu desga münberleriniň sygymy boýunça toplumyň iň iri desgalarynyň biri bolmak bilen, Olimpiýa stadionyndan soňra 2-nji orunda durýar. Ölçegleri70x40m bolan uniwersal arenany özünde jemlemek bilen, dürli sport ýaryşlarynyň geçiriljek ýeri boldy. Halkara kadalara laýyklykda, arena sportuň her görnüşi üçin ýöriteleşdirilen enjamlar bilen aýratynlykda üpjün edildi.

Başa-baş söweş sungaty sport toplumy

5000 tomaşaçylyk bu arenada başa-baş göreş sportunyň köp görnüşleri boýunça ýaryşlary geçirmek mümkin. Esasy zalyň ölçegi 52m x 30m bolup, ol bir wagtyň özünde üç sany tatami ýerleşdirmäge mümkinçilik berýär. Bu arenada göreş, sambo, boks, taekwondo we agyr atletika ýaly sport ýaryşlaryny geçirip bolýar. Desganyň taslamasy düzülende şol sportlar boýunça bildirilýän Olimpiýa talaplary göz öňünde tutuldy.

Saglygy dikeldiş merkezi

Lukmançylyk we saglygy dikeldiş merkezi toplumda aýratyn duran iki gatly bina hökmünde meýilleşdirilen we ol beýleki sport desgalaryna iň ýakyn aralykda ýerleşýär. Merkeziň otaglarynyň sanawy işlenip düzülende sagaldyş-öňüni alyş desgalaryna bildirilýän degişli talaplardan ugur alnan. Lukmançylyk we saglygy dikeldiş merkeziniň otaglary iki blokda jemlenen, olaryň birinde gidroterapiýa bölümi, beýlekisinde fizioterapiýa bölümi ýerleşýär. Mundan başga-da, lukmançylyk we saglygy dikeldiş merkezinde ýöriteleşdirilen bölümleriň bir topary: bedenterbiýe-sport dispanseri, barlag otagly mini barlaghana, antidoping barlaghanasy, ylmy-barlag bölümi, şeyle hem psihologik taýdan yeňlediş bölümi göz öňünde tutulýar. Bu Merkeziň ýerine ýetirýän hyzmatlary ony ilatyň zerurlyklary üçin poliklinika hökmünde-de ulanmaga mümkinçilik berýär.

Türgenleşik zallary

Olimpiýa şäherçede türgenler üçin ýokary hilli okuw-türgenleşik şertlerini üpjün etmek maksady bilen türgenleşik zallary meýilleşdirilen. Her birinde türgenleşik zal toplumy bar bolan iki sany aýratyn desga göz öňünde tutulan. Olaryň biri 15000 tomaşaçylyk üsti ýapyk arenanyň ýanaşygynda ýerleşýär. Bu toplumdaky türgenleşik zallary gandbol, woleýbol, basketbol we ş.m. sportlar üçin ýörite niýetlenýär. Beýleki türgenlşik zal toplumy 5000 tomaşaçylyk üsti ýapyk arenanyň golaýynda ýerleşýär. Ol, umuman, söweş sungaty ýaly sportuň başabaş görnüşleri üçin niýetlenilen türgenleşik zallaryndan ybarat. Milli göreş türkmen sportunda aýratyn orun eýeleýär.

Restoran

Biri-biriniň üstüne abanýan 3 sany käse görnüşli restoranyň binasy Olimpiýa şäherçäniň iň gözel künjeginde, emeli kölüň kenarynda ýerleşýär. Binanyň üçeginde tomus wagtynda ulanyp bolýan iki sany terrasa bar bolup, olarda ýene-de 312 sany adamy ýerleşdirmek bolar. Bu ýerde gelýan adamlara dürli milletleriň tagamlary, şol sanda türkmen milli naz-nygmatlary hödürlener.

Işewürlik merkezi

10 ýyl Abadançylyk şaýolunyň günorta tarapynda meýilleşdirilen Işewürlik merkezi ýoluň üstünden geçýän köpri gat arkaly birleşýän iki sany blokdan emele gelýär. Bina sport toplumynyň beýleki desgalarynyň bezegine gabat gelýän häzirkizaman binagärlik usulynda ýerine ýetirildi. Işewürlik merkeziniň ýokarky gatlaryna Türkmenistanyň Sport baradaky döwlet komiteti ýerleşer. Galan ýerler sport federasiýalaryna, assosiasiýalaryna we guramalaryna berler.

Köpugurly sport meýdançasy

Olimpiýa şäherçesinde futbol we ýeňil atletika boýunça türgenleşik geçmäge niýetlenilen 2 sany açyk meýdança bar. Ol meýdançalaryň taslamasy sportuň futbol we ýeňil atletika görnüşleriniň ölçeglerine we talaplaryna laýyklykda düzülen. Meýdançalaryň jemi 1000 orunlyk münberler bar. Münberleriň aşaky gatynda türgenleriň we tomaşaçylaryň zerurlyklaryna laýyklykda dürli otaglar göz öňünde tutulan. Üsti üçek bilen ýapylan münberler türkmen halkynyň milli binagärlik däpleriniň ajaýyp nusgalary bilen bezelen.

VIP üçin sport binasy

Bu desgada 40х20m ölçeginde uniwersal sport zaly, 25х12,50m ölçeginde howuz, iki sany trenažýor zaly, şeýle hem, içinde saunalar, italýan we türk hammamlary, massaž we dynç alyş otaglary bar bolan suw-sagaldyş bölümleri bar. Bina häzirkizaman tehniki serişdeler we zerur sport enjamlary bilen üpjün edilen.

Jemgyýetçilik-medeni merkezi

Medeni-jemgyýetçilik merkezi ýaşaýyş jaýlaryň ýanynda ýerleşýär we ýerzemin gaty bilen jemi 3 gatdan ybarat. Ýaşaýyş jaýlarynda bolýan türgenler ol merkezlerden medeni we jemgyýetçilik çäreler üçin peýdalanyp bilerler. Bu jemgyýetçilik merkezde düýä ülňilerine gabat gelýän bufet, restoran, kinoteatr, kafe, muzeý, billiard, kitaphana, dellekhana, aýdym-saz otagy, bank, dükan, gury görnüşde kir arassalama ýeri we poçta ýaly ýerler hem ýerleşdirilen. 

“Olimpiýa” ve “Sport” myhmanhanalary

Bu myhmanhanalar Olimpiýä şäherçäniñ günorta böleginde ýerleşýär. Sekiz gatdan ybarat 450 orunlyk “Olimpiýa” muhmanhanasy ýokary wezipeli adamlar, hormatly myhmanlar hem-de wekiliýetler üçin guruldy. Binanyň içindäki bezegler türkmeniň milli äheňindedir.

Bu 800 orunlyk bolan “Sport” myhmanhanasynda metbugat işgärleri üçin merkez hem bar. Bu myhmanhana daşary ýurtly myhmanlaryň, wekiliýetleriň, sport federasiýalaryň we köpçülikleýin habar beriş serişdeleriniň wekilleriniň ýaşamagy üçin niýetlenýär.

Myhmanhanalarda kafeler, restoranlar, iş maksatly duşuşyklar üçin otaglar, 700 orunlyk maslahat zallary, resmi kabul edişlikler üçin zallar, sport we sagaldyş bölümleri, spa merkezleri hem bar.