Türkiýe we Gazagystanyñ daşary işler ministri bilelikde metbugat ýygnagy geçirdi

Türkiýäniñ daşary işler ministri Mewlüt Çawuşogly: “Gazagystan bilen ikitaraplaýyn gatnaşyklary we sebitleýin hyzmatdaşlygy hasam ösdürmegi maksatlaýarys”- diýdi.

17 Mart 2021 18:16

Türkiýäniñ daşary işler ministri Mewlüt Çawuşogly we Gazagystanyñ wise-premýeri we daşary işler ministri Muhtar Tileuberdi geçirilen ikiçäk we toparara gepleşiklerden soñ bilelikde metbugat ýygnagy geçirdi.

Ministr Çawuşogly, Merkezi Aziýa ýurtlaryna guran iş saparyndan gysga wagt soñ Gazagystanly kärdeşi Muhtar Tileuberdiniñ Türkiýä guran iş saparynyñ Türk dünýäsi bilen baglaryñ hasam pugtalanandygyny görkezýändigini aýtdy.

Daşary işler ministri Mewlüt Çawuşogly, Gazagystany Garaşsyzlygynyñ 30 ýyllygy bilen gutlap, geçirilen toparara gepleşiklerde 2022-nji ýylda iki ýurduñ arasynda diplomatik gatnaşyklaryñ ýola goýulmagynyn 30 ýyllygy mynasybetli bilelikde geçiriljek çäreleriñ ara alynyp maslahatlaşylandygyny aýtdy.

Iki ýurduñ arasynda dördünji ýokary derejeli strategiki geňeş sammitine taýynlygyñ başlanandygyny we bu mehanizmiň çäginde döredilen bilelikdäki strategiki meýilleşdiriş ýygnagyny geçirendiklerini nygtan ministr Çawuşogly gepleşiklerde ikitaraplaýyn gatnaşyklaryñ hemmetaraplaýyn ara alynandygyny aýtdy.

Çawuşogly koronawirus epidemiýa garamazdan iki ýurduñ arasyndaky söwda dolanyşygy mukdarynyñ aşaklamadygyna ünsi çekip, “öñümizde iki ýurduñ döwlet ýolbaşçylarynyñ ozaldan tassyklan maksatnamalarymyz bar. Ol hem ilki bada söwda dolanyşygy mukdaryny 5 milliard dollara soñ bolsa 10 milliard dollara ýetirmek”- diýdi.

Geçirilen gepleşiklerde söwda, ykdysadyýet, ulag, howpsuzlyk, goranyş senagaty we konsullyk ýaly köp sanly meseläni ara alandyklaryny habar beren Çawuşogly, iki ýurduň arasynda käbir şertnamalary täzelemek üçin işe başlandyklaryny we  takmynan 20 resminama gol çekilmegi göz önünde tutulýandygyny aýtdy.

Çawuşogly gepleşiklerde Merkezi Aziýa, Türk Geñeşi, Daglyk Garabag ýaly sebitleýin meseleleriñ hem ara alynandygyny nygtap, 31-nji martda Gazagystanyñ Türkistan şäherinde Türk Geñeşi Liderleriniñ resmi bolmaýan sammitiniñ geçiriljekdigini we 2021-nji ýylyñ soñlarynda bolsa Türk Geñeşiniñ Liderler Sammitiniñ Türkiýede geçiriljekdigini habar berdi.

Ministr Çawuşogly, Türk Howa ýollarynyñ we hususy awiasiýa firmalarynyñ Gazagystan we Türkiýe arasyndaky uçar gatnawlarynyñ koronawirus epidemiýadan ozalky ýagdaýa gelmegi, guru ýer we demiryolu gatnawlary we bu pudakda bilelikde durmuşa geçiriljek taslamalary hem Gazagystanly kärdeşi bilen ara alyp maslahatlaşandyklaryny aýtdy.

Owganystan, Kipr, Uýgur türkleri we Russiýa bilen gatnaşyklar ýaly meseleleri hem Gazagystanly kärdeşi bilen ara alandyklaryny bellän Çawuşoglu: "Biziň maksadymyz gatnaşyklarymyzy ösdürmek we sebitleýin başlangyçlarymyzy we ikitaraplaýyn gatnaşyklary güýçlendirmek” - diýdi.