26 Kasım 2021 19:13
Türkmenistanyñ Ahal welaýatynyñ Kaka etrabynyñ Mäne obasynyñ golaýyndaky biziñ eýýamymyzdan öñki 4-11-nji müñýyllykda ýaşaýyş bolan Altyndepede tapylan düýä tirkelen dört tigirli arabañ palçykdan ýasalan şekili hem mundan bäş müñ ýyl ozal Türkmenistanyñ çäginde düýedarçylyk bilen meşgullanylypdyr diýmäge esas berýär.
Türkmenistan ýeke örküçli arwana düýeleriñ iñ köp ýaýran ýeridir. Arwana düýeleri Türkmenistanyñ gurak we yssy howasyna, Garagumyñ giñ sährasyna iñ uýgunlaşan tohum bolup türkmen halkynyñ umumy adamzat siwilizasiýasyna çykaran gaýtalanmajak sungatydyr.
Türkmen hakynyñ durmuşynda Arwana düýesiniñ ähmiýeti örän uly. Şonuñ üçinem Türkmenistanda Arwana düýesiniñ tohum arassalygyny, ginetiki aýratynlygyny saklamaga, goramaga uly üns berilýär. Öz tebigaty boýunça Arwana düýesi asuda, agras, akylly häsiýetleri bilen tapawutlanýar. Arwana düýesi Türkmenistanyñ çaginde ähli welaýatlarynda giñ ýaýrandyr. Aýratynam ol Garagum çölüne diýsen uýgunlaşan. Garagumy düýesiz göz öñüne getirmek mümkin däl. Türkmenlerde düýäñ piri Weýis baba hasaplanýar. Rowaýatlara görä Weýis Baba, gadymy zamanlarda belli düýe çopany bolupdyr. Düýe barada onuñ bilmeýän zady ýok eken. Türkmenlerde düýe çopanyna “sarwan” diýilýär. Özüniñ syrly aýratynlyklary bilen arwana düýesi Garagumyñ jöwzaly yssy şertlerinde arkaýyn ýaşap bilyär. Tomus aýlarynda Garagumda howanyñ gyzgynlygy 50-60 derejä baranynda-da düýe ýasy dawanyna arkaýyn gezip ýada arka dawanlaryndaky we döşindäki şeyle-de jübit-jübitden dyzlaryndaky goluñ çykýan ýerlerindäki we butlaryñ tirseklerindäki yssa hem-de sowuga çydamly gaty gabarçyklañ dokuz nokadyñ üstünde arkaýynlykda çökip oturyp bilýär. Ol “çök” diýip çökerilýär “çuw” diýibem turuzylýar. Düýe çöken wagty uzyn aýaklaryny epin epin edip öz aşagyna ýygnap bilýär. Tabak şekilli tegelek dawanlary ürgün çägede düýäni çägä batyrmaýar. Arwana düýesi suwyñ gyt ýerinde ownuk mallaryñ iýip bilmeýän iri ballakly otlary, gyrymsy agaçlaryñ we odun çöpleriñ pürleri bilen ýyl boýy oñyp bilýär. Ýandak bolsa düýäniñ iñ oñat görýän höregidir. Düýe yssy howada bir hepdeden on güne çenli suwsyz oñyp bilýär. Düýäniñ içýän suwunyñ mukdary onuñ suwsuzlyk derejesi bilen baglydyr.
Durmuş tejribesin, hünärmenleriñ ýazmagyna görä günde iki gezek suwa ýakylýan düýe her gezek howlukdyrylmasa 15-20 minutda 3-4 bedre suw içýär. Gaty suwsan düýe 135 litre çenli suw içip bilýär. ýaşynyñ ulalmagyna göra arwana uzak aralykda suw bardygyny 10 kilometr aralykdan hem duýýar. Tomsuñ jöwzaly yssysynda uzak wagtlap suwsuzlyga çydamlylygynyñ esasy sebabiniñ biri onuñ örgüjünde köp ýag toplap bilýändigidir. Gyşda bolsa düýe uzak wagtlap suw içmän çydap bilýär. Düýe jöwzaly yssyda beýleki haýwanlar ýaly salkyn ýeri gözläp ýörmeýär. Arwana düýesiniñ iñ syrly häsiýetlerinden biri bolsa onun aşa suwsan mahaly gös göni güne bakyp oturmagy.
Arwana düýesi özüniñ agras häsiýeti, gurak we yssy howa çydamlylygy, hojalykdaky ýük daşamak talaplaryny kanagatlandyrmaga ukyplylygy bilen türkmene in ýakyn mallardan biridir.
Türkmenler düýäni ulag hökmünde has irki döwürlerde ulanyp başlapdyrlar. Suwsuz çöllerde, çägeliklerde münmek, ýük daşamak üçin asyrlar boýy çalşyrylyp bolmajak ulag hökmünde arwana düýeleri adamlara hyzmat edip gelipdir. Irki döwürlerde agyr ýükleri uzak aralyklara aşyrmak üçin düýe kerwenleri esasy serişde bolupdyr. Beýik ýüpek ýolunyñ esasy ýeke täk diýen ýaly ulagy düýeler bolupdyr.
Garagumuň jümmüşinde ýaşaýan islendik hojalygy düýesiz göz öňüne getirmek kyn. «Düýe maly-dünýe maly» diýlişi ýaly, düýäniň eýesine wepalylygyna, hamraklygyna haýran galaýmaly. Çarwa obalarynda düýe bakmak ýaly asylly kär bilen meşgullanýan döwletli çopanlaryň ençemesi bar.
Türkmen arwanasy özüniň saglyga peýdaly ýüňi, süýdi, eti, derisi bilen beýlekilerden düýpli tapawutlanýar. Önümçilik şertlerinde arwana düýeler ortaça 20-25 ýyl ýaşaýarlar. Şol döwrüň içinde jemi 8-10 köşek berýän arwana düýeleri ortaça 400-600 kilograma barabar bolýar. Türkmen arwanasynyň süýtliligi hem beýleki tohumlardan iki esse ýokarydygy bilen tapawutlanýar. Geçirilen barlaglaryň netijesinde arwana düýeleriniň sagym döwrüniň dowamynda 2000-2500, käbir süýtli düýeleriň bolsa 4000 litre çenli süýt berýändigi anyklandy.
Düýe öz köşegini bir ýyllap göterýär. Şonuň üçin düýeler köşegi ýylda däl-de, ýylaşa berýär.
Düýe çalynyň jöwzaly yssyda suwsuzlygyňy gandyrýan içgi bolmak bilen çäklenmän, eýsem, içki synalaryň dürli keselleri zerarly ýüze çykan bozulmany dikeldýändigini alymlar anyklady. Şeýle hem düýäniň süýdi, çaly, agarany inçekeseli bejermekde gymmatly derman hasaplanýar.
Düýe süýdüniň ýaglylygy, düzüminde belok we mineral maddalarynyň köplügi ondan birnäçe görnüşli önümleri taýýarlamaga mümkinçilik döredýär. Düýe süýdünden çal, agaran, doýran, süzme, gurt ýaly önümler alynýar. Biziň gündelik durmuşymyzda kabul edilmeli süýt we süýt önümleriniň içinde düýe süýdüni we onuň önümlerini peýdalanmak has ygtybarly bolsa gerek. Sebäbi düýe süýdi aşgazan-içege, ýürek-damar, dem alyş, iýmit siňdiriş ulgamlarynyň näsazlyklarynyň we birnäçe ýokanç keselleriň bejergisiniň täsirini artdyrýandygyny alymlar subut etdi. Düýäniň süýdi we eti berhizlik mal önümi hasaplanylyp, oňa Türkmenistanyň islendik künjeginde köp isleg bildirilýär. Geçirilen barlaglaryň netijesinde düýe süýdüniň düzüminde adam üçin zerur bolan ýagyň, uglewodyň, belogyň, mineral maddalaryň we witaminleriň 100-den gowragynyň saklanýandygy anyklanyldy. Olar bolsa bedenimiz tarapyndan ýeňil özleşdirilip, aşgazan-içege ýollaryndaky dürli näsazlyklaryň, howply keselleriň öňüni almaga ýardam edýär.
Düýe süýdüniň düzüminde süýt şekeri, belok, kazein, albumin we globulin ýaly witaminler saklanýar. Başga önümlerde duş gelmeýän kazein düýe süýdünde kalsiý fosfat toplumy görnüşinde ýerleşýär. Düýe çaly taýýarlanylanda birnäçe fermentleriň täsiri esasynda kazein düýbüne çöküp, albumin we globulin suw görnüşinde süýdüň ýüzüne çykýar. Düýe süýdi zyýanly bedenjikleri öldüriji häsiýete eýedir. Hut şeýle dermanlyk häsiýetlerini görüp, durmuşda peýdalanyp gelýän Türkmen halky «Düýe çaly – derde däri» diýýär.